सञ्चारपत्र सम्वाददाता
भरतपुर, १८ असोज
जिल्ला निर्वाचन कार्यालय, चितवनले बदर मतको संख्या घटाउनको लागि प्राविधिक योजनाहरुमा जोड दिएको जनाएको छ ।
मंसिर–४ मा हुने दोस्रो संविधानसभा निर्वाचनमा मतदाताको प्रतिशत अघिल्ला निर्वाचनहरुमा भन्दा बढाउने र बदर मतको संख्या घटाउको लागि जिल्ला निर्वाचन कार्यालय, चितवनले मतदाता शिक्षा स्वयम्सेवक र निर्वाचन शिक्षा कार्यकर्ताहरुलाई तालिम दिइसकेको जिल्ला निर्वाचन अधिकृत हरिप्रसाद ढकालले जानकारी दिएका छन् ।
कार्यालयले चितवनको प्रत्येक मतदान स्थलमा एक जनाका दरले खटिने गरि एक सय ४१ जना मतदाता शिक्षा स्वयम्सेवक र प्रत्येक गउँ विकास समिति तथा नगरपालिकाको प्रत्येक वडामा खटिने गरि ६३ जना निर्वाचन शिक्षा कार्यकर्तालाई मतदाता शिक्षा कार्यक्रममा खटाउने भएको छ । ‘मतदाता शिक्षा स्वयम्सेवक र निर्वाचन शिक्षा कार्यकर्ताहरुलाई तालिम दिइसकेका छौँ, मतदाता शिक्षा सामाग्री आएपछि उनीहरुलाई कार्यक्षेत्रमा खटाउने छौँ’ जिल्ला निर्वाचन अधिकृत ढकालले भने ।
मतदाता शिक्षा स्वयम्सेवक र निर्वाचन शिक्षा कार्यकर्ताहरुले जनता समक्ष गएर भोट हाल्नको लागि आग्रह गर्ने तथा भोट कसरी हाल्ने भन्ने विषयमा समेत जानकारी दिने ढकालले बताए । भोट हाल्न जाँदा मतदाताले साथमा लानुपर्ने वस्तुहरु के के हुन्, कसरी मतदान गर्दा भोट सदर हुन्छ भन्ने विषयमा पनि उनीहरुले मतदातालाई सिकाउने छन् ।
पहिलो संविधान सभाको निर्वाचन– २०६४ मा चितवनमा तीन लाख ८२ हजार पाँच सय ८० मतदाता रहेकामा दुई लाख ४० हजार एक सय ५१ अर्थात ६२ दशमलव ७७ प्रतिशत मतदान भएको थियो । जसमध्ये सदर मतको संख्या दुई लाख २९ हजार छ सय १९ थियो । बदर मत १० हजार पाँच सय ३२ अर्थात् चार दशमलव ३९ रहेको थियो ।
