कृष्णप्रसाद अधिकारी हत्या घटनाका एक अभियुक्त पक्राउ

सञ्चारपत्र सम्वाददाता
भरतपुर, २१ भदौ
प्रहरीले गोरखा फुजेलका कृष्णप्रसाद अधिकारीको हत्यामा संलग्न भएको अभियोगमा शुक्रवार काठमाडौंको बागबजारबाट एकीकृत नेकपा (माओवादी) का कार्यकर्ता रामप्रसाद अधिकारीलाई पक्राउ गरेको छ । गोरखा फुजेल गाविस–४ का ३५ वर्षिय रामप्रसादलाई चितवनबाट खटिएको प्रहरी टोलीले दिउँसो २ बजे पक्राउ गरेको थियो ।
जिल्ला प्रहरी कार्यालय, चितवनका प्रवक्ता प्रहरी नायव उपरीक्षक सञ्जय राउतले रामप्रसादलाई शुक्रवार नै काठमाडौंबाट चितवन ल्याइएको सञ्चारपत्रलाई जानकारी दिएका छन् । साँझ चितवन ल्याइएका रामप्रसादको मेडिकल चेकअप गरि हिरासतमा राखिएको प्रहरीले बताएको
छ ।
आफ्ना कान्छा छोराका हत्यारालाई कारवाही गर्नुपर्ने माग गर्दै नन्दप्रसाद अधिकारी र गंगामाया अधिकारी दम्पती डेढ महिनादेखि वीर अस्पतालमा आमरण अनसनमा बसेका छन् । सरकारले अधिकारी दम्पतीको माग बमोजिम कृष्णप्रसादको हत्या आरोपमा रामप्रसादलाई गिरफ्तार गरेको हो ।
उता, आफ्ना कार्यकर्ता पक्राउको बिरोधमा एनेकपा माओवादी केन्द्रीय कार्यालयले शनिवार चितवन, राजधानी उपत्यका र गोरखा जिल्ला बन्द गर्ने निर्णय गरेको छ । नेपाली हिन्दु महिलाहरुको महान पर्व हरितालिका तीजको अघिल्लो दिन शनिवार गर्न लागिएको बन्दले तीजलाई प्रभावित पार्ने भएको छ ।
गोरखा जिल्ला फुजेल गाविस–७ का १७ वर्षिय कृष्णप्रसाद अधिकारीको तत्कालीन नेकपा (माओवादी) का कार्यकर्ताले ०६१ जेठ २४ गते चितवनको रत्ननगर नगरपालिका–१, बकुल्लहरबाट अपहरण गरि गोली हानेर हत्या गरेका थिए ।