ब्युँतियो युथ फोर्स : चन्द्र लामा संयोजक

रत्ननगर, ३० भदौ
नेकपा (एमाले)कोे युवा संगठन युवासंघ नेपालको चितवनमा आयोजित राष्ट्रिय कार्यकर्ता भेलाले संघका केन्द्रीय सचिव चन्द्र लामाको संयोजकत्वमा २५ सदस्यीय युथ फोर्स केन्द्रिय समिति घोषणा गरेको छ । युथ फोर्सको उपसंयोजकको जिम्मेवारी धु्रव आचार्य र सचिवको जिम्मेवारी दर्शन लामालाई दिइएको छ ।
युवासंघको विधान अनुसार २५ सदस्यीय युथ फोर्ससँगै निर्वाचनलाई ध्यानमा राख्दै एक सय ७५ सदस्यीय केन्द्रिय युथ फोर्सको समेत घोषणा गरिएको छ । केही दिन भित्रै जिल्ला, क्षेत्र, नगर, वडा तथा बुथ तह सम्म युथ फोर्सका ईकाई गठन गरिने केन्द्रिय संयोजक चन्द्र लामाले जानकारी दिए ।
संविधान सभा निर्वाचनमा अन्य दलका युवा संगठनबाट हुन सक्ने अबाञ्छित क्रियाकलाप रोक्न, निर्वाचनलाई भयरहित बनाउन युथ फोर्सको पुनर्गठन गर्नुपरेको लामाले बताए । युवा संगठनको छुट्टै दस्ता तयार पार्दा द्वन्द्व चर्कने भन्दै चौतर्फी आलोचना भएपछि चार बर्ष देखि नेकपा एमालेले युथफोर्सलाई निष्कृय राखेको थियो ।
संविधान सभा निर्वाचन नजिकिंदै गर्दा युवासंघका अगुवाहरुले युथ फोर्स गठन गर्नुपर्ने दवाव दिएपछि चितवनमा आयोजित राष्ट्रिय कार्यकर्ता भेलाबाट फोर्स पुनर्गठन गरिएको हो । युथ फोर्सका पूर्व संयोजक महेश बस्नेत युवासंघ नेपालका अध्यक्ष भएपछि युथफोर्सको छुट्टै समिति बन्न सकेको थिएन ।
भेलाबाट निर्वाचन परिचालन कमिटिको संयोजकको जिम्मेवारी पाएका युवासंघका केन्द्रिय अध्यक्ष महेश बस्नेतले बन्दसत्रलाई सम्बोधन गर्दै मतदाता र मत पेटिकाको सुरक्षाका लागि बुथ बुथमा युथ फोर्सको ईकाई गठन गरेर काम अगाडी बढाईने जानकारी दिए ।
देशभरीका झण्डै आठ सय युवा प्रतिनिधिहरुको सहभागीता रहेको राष्ट्रिय कार्यकर्ता भेलाको शनिबार एमाले अध्यक्ष झलनाथ खनालले भरतपुरमा उद्घाटन गरेका थिए ।
यसैबीच, एमाले नेता केपी ओलीले बैद्य नेतृत्वको नेकपा–माओबादीलाई देखाएर एकीकृत नेकपा माओबादी नै निर्वाचन हुन नदिने षडयन्त्रमा लागेको आरोप लगाएका छन् । युवासंघ नेपालको रत्ननगरमा आयोजित राष्ट्रिय कार्यकर्ता भेलाको बन्दसत्रलाई सम्बोधन गर्दै नेता ओलीले एकीकृत नेकपा माओवादीले आफ्नो पक्षमा जनलहर नभएको देखेर निर्वाचन सार्ने षडयन्त्र गरेपनि त्यो सफल हुन नसक्ने बताए । निर्बाचन मंसिर ४ मै हुनुपर्ने बताउँदै ओलीले आफ्नो भूमिका सशक्त बनाउन युवासंघका कार्यकर्तालाई आहन गरे ।
बन्दसत्रलाई सम्बोधन गर्दै नेकपा एमालेका महासचिव इश्वर पोखरेलले जनताको बिश्वासको आधारमा भन्दा पनि जबरजस्तिबाट निर्वाचनको परिणाम आफ्नो पक्षमा पार्न खोज्नेहरुलाई रोक्न युथफोर्सले सृजनात्मक भूमिका खेल्ने बताए । पार्टीको नीति, निर्देशन र नियन्त्रणमा युथफोर्सले आफ्ना गतिबिधि अगाडि बढाउनु पर्नेमा जोड दिंदै पोखरेलले शान्तिपूर्ण, भयरहित वातावरणमा निर्वाचन हुनसके लोकतान्त्रिक पक्षधर दलहरुको दुई तिहाई मत आउने समेत बताए ।   
एमाले सचिव शंकर पोखरेलले युवा शक्तिको निर्वाचनका बेला महत्वपूर्ण भूमिका हुने भएकोले सशक्त रुपमा परिचालित हुन निर्देशन दिए ।