थप ५५८ घरधुरी स्थानान्तरण गर्न माग
सञ्चारपत्र सम्वाददाता
भरतपुर, २१ जेठ
जिल्ला दैवी प्रकोप उद्धार समिति चितवनले भूकम्पका कारण क्षतिग्रस्त दुई वटा पहाडी गाउँलाई सुरक्षित स्थानमा सार्ने तयारी गरेको छ ।
वैशाखमा आएको महाभूकम्पका कारण पहाड नै धाँजा फाटेपछि त्यस वरिपरिको बस्ती सार्ने निर्णय भएको जिल्ला दैवी प्रकोप उद्धार समिति चितवनका सदस्य सचिव एवम् स्थानीय विकास अधिकारी भरतमणि पाण्डेले बताए । चितवनको काउले गाविसको गुजीबाङ र लोथर गाविसको इसीखाई गाउँ भूकम्पको कारण धरापमा रहेको स्थानीय विकास अधिकारी पाण्डेले जानकारी दिए ।
गुजिबाङ गाउँका २३ घरधुरीलाई शक्तिखोर गाविसको जुटपानीमा रहेको माओवादी क्यान्टोनमेन्टमा राखिने तयारी भएको पाण्डेले जानकारी दिए । त्यसैगरी, इसीखाई गाउँका ११ घर परिवारलाई लोथरकै यउरालीटारमा सार्ने तयारी भएको पाण्डेले बताए । उनीहरुलाई अबको एक हप्ता भित्रमा उक्त स्थानमा सारिने पाण्डेले बताए ।
लोथर र काउलेका ती दुई वटा बस्तीको पहाड चिरा परेको र पहाडका कारण गाउँ जोखिममा रहेको प्राविधिक अध्ययन अनुसार उनीहरुलाई स्थानान्तरण गर्न लागिएको पाण्डेले बताए । उक्त बस्तीलाई सार्नको लागि जस्तापाता, डण्डी लगायतका सामग्री जुटाउने तयारी भइरहेको पाण्डेले बताए । एउटा घर निर्माण गर्नको लागि एक लाख रुपैयाँदेखि एक लाख ५० हजार रुपैयाँसम्म खर्च हुने पाण्डेले जानकारी दिए ।
काउले र लोथार गाविसका दुई वटा गाउँलाई स्थानान्तरण गर्ने जिम्मा आरआरएन र सेवा फाउण्डेसनले लिइसकेको पाण्डेले जानकारी दिए । ती दुई वटा संस्थाहरुले चेपाङहरुको लागि विभिन्न कार्यक्रम गर्दै आएका थिए । चितवन भूकम्प प्रभावित जिल्ला भएपनि शङ्कटग्रस्त घोषणा नगरिएका कारण पुनर्निर्माण गर्नको लागि थप चुनौति रहेको पाण्डेले बताए ।
पुनर्निमाणको लागि सरकारबाट सहयोग नआएपनि आफूहरुले विभिन्न संघ संस्थाहरुसँग मिलेर काम गर्ने पाण्डेले बताए । बस्तीको पुनर्निर्माणको लागि धेरै संघसंस्थाहरु तयार भएका कारण वर्षात्को समय अगाडि नै भूकम्प पीडितको लागि अस्थयी टहरा निर्माण गरिसक्ने पाण्डेले बताए ।
त्यसैगरी, दारेचोकको घुसा, चण्डी भञ्ज्याङको थाम, शक्तिखोरको नानडाँडा लगायतका पाँच वटा गाउँलाई अन्यत्र सार्नुपर्ने माग भएको जिल्ला दैवी प्रकोप उद्धार सहित चितवनका स्रोत व्यक्ति बलराम लुइँटेलले बताए । नेपाल चेपाङ संघ जिल्ला कार्य समिति चितवनले चण्डिभञ्ज्याङको एक सय २६ घर, काउलेको ८० घर, सिद्धिको दुई सय ५० घर लोथरको २२ घर र दारेचोकको ३१ घरलाई सुरक्षित स्थानमा सार्नको लागि ज्ञापनपत्र बुझाएका स्थानीय विकास अधिकारी भरतमणि पाण्डेले बताए । ती बस्तीलाई कसरी सुरक्षित गराउने भन्ने बारेमा छलफल सुरु भएको पाण्डेले बताए ।
यसैबीच, वैशाख १२ गते आएको महाभूकम्प र त्यसपछिको पराकम्पनका कारणले चितवन पु¥याएको क्षतिको पूर्ण विवरण बिहीबारसम्म प्राप्त भइसकेको छैन । बिहीबारसम्म प्राप्त भएको तथ्याङ्क अनुसार चितवनका दुई हजार ६४ घर पूर्ण रुपमा क्षति भएको जिल्ला दैवी प्रकोप उद्धार समिति चितवनका स्रोत व्यक्ति बलराम लुईँटेलले बताए । त्यसैगरी, चितवनमा पाँच हजार नौ सय १५ घरमा आंशिक क्षति पुगेको र नौ हजार एक सय ६५ घरमा सामान्य क्षति पुगेको लुईँटेलले जानकारी दिए ।
