शालिकराम भट्टराई
कावासोती ७, वैशाख
नेकपा एमालेका अध्यक्ष केपी शर्मा ओलीले प्रक्रियाबिना संविधान नबन्ने बताएका छन् । ‘संविधानसभाले प्रक्रियाबाटै संविधान निर्माण गर्ने हो । त्यो प्रक्रिया थाल्दा बहुमतीय हुन्छ भन्ने कुरा फिक्का हुन्छ’, अध्यक्ष ओलीले भने–‘सहमति भएका कुरामा अगाडि बढ्छौं र हुन बाँकी विषयमा आगामी दिनमा सहमति गर्दै जान्छौं’ ।
मदन भण्डारी स्पोटर्स एकेडेमीले कावासोतीमा गरेको पिपुल कन्सर्टको उद्घाटन गर्दै ओलीले भने–‘एमालेको हैसियत पहिलाको जस्तो होइन र छैन । पार्टी संविधान निर्माणको पक्षमा दृढ संकल्पित छ ।’ असार मसान्तसम्ममा संविधान जारी गर्नेगरी कामलाई अगाडि बढाएको अध्यक्ष ओलीको दावी थियो ।
अध्यक्ष ओलीले संविधान निर्माणका लागि भन्दै आन्दोलन गरेको ३० दलीय मोर्चाको गतिविधिलाई ‘उत्ताउला’को संज्ञा दिँदै त्यसले संविधान निर्माणको वातारण बन्दैन भने । ‘संविधानको नाममा कलहको बीउ रोप्ने काम एमालेबाट हुँदैन ओलीले भने–‘संविधान नबनाइ संविधानसभा सकिँदैन ।’
मधेसी दलतर्फ इंकित गर्दै अध्यक्ष ओलीले एमालेको हातमा सत्ता पर्ने वित्तिकै मधेसका क्षेत्रमा विकास योजना लाने आश्वासन बाँढे । उनले मधेशमा शिक्षा, स्वास्थ्य, करकारखाना उद्योग धन्दा बिस्तार गरिने भन्दै सम्पूर्ण आम नेपालीहरुलाई एमालेलाई साथ दिन आग्रहसमेत गरे ।
असार मसान्तसम्ममा संविधान ः अध्यक्ष ओली
चितवनमा स्वाइनफ्लु संक्रमितको संख्या १६६
‘एक जनामात्रै अस्पतालमा
तीर्थ नेपाल
भरतपुर, ७ वैशाख
चितवनमा स्वाइनफ्लुबाट संक्रमित हुनेको संख्या बढ्दै गए पनि कसैलाई पनि जटिलता देखिएको छैन । जिल्लामा परीक्षण गरिएका मध्ये हालसम्म १६६ जनालाई एन्फ्लुएन्जा एचवान् एनवान् (स्वाइनफ्लु) भएको जनस्वास्थ्य कार्यालयले जनाएको छ । तर, अस्पतालमा एक जनामात्र भर्ना अवस्थामा उपचाररत रहेको भरतपुर अस्पतालका फिजिसियन डा. भोजराज अधिकारीले बताए ।
रुघाखोकी र ज्वरो आई परीक्षण गराएका ५५६ जनामध्ये १६६ जनामा स्वाइनफ्लु देखिएको छ । जसमा महिला ९७ र पुरुष ६९ जना रहेका छन् । ५३ जनाको परीक्षण रिपोर्ट काठमाडौबाट आउन बाँकी छ । यस हप्ता परीक्षणका लागि पठाएका ५४ जनामध्ये १३ जनामा स्वाइनफ्लु देखिएको छ ।
भरतपुर अस्पतालमा उपचारका लागि आएका मध्ये चितवनका १३८, नवलपरासीका १७, उदयपुर, रौतहट, कास्की, जनकपुर, गोर्खा, पर्सा, तनहूँं, काभ्रे, महोत्तरी र बाराका एक–एक जनालाई संक्रमण देखिएको हो ।
चितवनको भरतपुर उप–महानगरपालिका वडा नम्बर १० र ११ मा संक्रमित हुनेको संख्या धेरै रहेको जिल्ला जनस्वास्थ्य कार्यालयका भेक्टर कन्ट्रोलर रामकुमार केसीले बताए । ‘यी दुईवटा वडामा बढी संख्या देखिएको छ । यंहाँका स्थानीय सर्वसाधारणले बढी सजकता अपनाउनुपर्ने देखिन्छ, जोखिम देखिएको छ’– केसीले भने । भरतपुर अस्पतालमा श्रोत र जनशक्तिको अभाव नभएकाले पनि कुनै पनि बिरामीलाई ‘रेफर’ गर्नुपर्ने अवस्था सिर्जना नभएको केसीको दावी छ ।
अहिलेसम्म संक्रमित भएका मध्ये १० जनामात्रै अस्पतालमा भर्ना भएर उपचार गराएको डाक्टर अधिकारीले जानकारी दिए । भर्ना हुनेको औसत अस्पताल बसाई तीन दिनको हुने गरेको छ । ‘कसैलाई पनि जटिलता देखिएको छैन, घर फर्किएकाहरु कोही पनि अफ्ठ्यारो परेर आएका छैनन्’–अधिकारीले भने ।
अस्पतालवाट डिस्चार्ज भई घर गएकाहरुलाई हालसम्म थप समस्या देखा नपरेको उनले बताए । जिल्लाको परिस्थिति हेर्दा आत्तिनुपर्ने अवस्था नरहे पनि सतर्क र सचेतता अपनाउनुपर्ने चिकित्सकको सुझाव छ । निमोनिया, क्षयरोग, क्यान्सर, एड्स अथवा अरु कुनै रोगहरु भएमा मात्रै एचवान् एनवान्ले जटिलता ल्याउने, नत्र बिस्तारै सुधार भई निको हुने चिकित्सकले बताए ।
जिल्ला जनस्वास्थ्य कार्यालयले सर्वसाधारणको सचेतनाका लागि स्थानीय सञ्चारमाध्यामहरुबाट प्रचार प्रसार भैरहेको जनाएको छ । स्वाइनफ्लु संक्रमितको स्वास्थ्य उपचारमा विशेष ख्याल गरिएको भेक्टर कन्ट्रोलर केसीले बताए । टेमिफ्लु नामक एन्टीबायोटिक औषधि बिरामीलाई निःशुल्क उलब्ध गराइएको उनले जानकारी दिए । गर्मी बढ्दै जाँदा स्वाइनफ्लुको संक्रमणमा कमी हुँदै जाने जनस्वास्थ्यका भेक्टर कन्ट्रोलर केसीले विश्वास ब्यक्त गरे ।
चितवनमा सन् २०१३ मा १० जना, सन् २०१४ मा ११ जनालाई स्वाइनफ्लु भएको थियो ।
सञ्चारपत्र दैनिक
